اسلام آباد (نیوز ڈیسک) شہر قائد میں جائیداد کے لالچ نے رشتوں کا تقدس روند ڈالا۔ کورنگی کے علاقے گلشنِ ملت سوسائٹی میں ایک نوجوان نے اپنے ہی خاندان پر اندھا دھند فائرنگ کر دی، جس کے نتیجے میں چار قریبی رشتہ دار شدید زخمی ہو گئے۔ریسکیو حکام کے مطابق واقعہ ایک رہائشی گھر میں پیش آیا جہاں سرور نامی شخص نے والد، والدہ، ماموں اور اپنے چھوٹے بھائی کو فائرنگ کا نشانہ بنایا۔
زخمیوں کو فوری طور پر طبی امداد کے لیے جناح اسپتال منتقل کر دیا گیا۔جائے وقوعہ پر پولیس فوراً پہنچی اور ابتدائی تحقیقات کے دوران بیانات قلمبند کرنے کے ساتھ شواہد اکٹھے کیے۔ تفتیشی افسران کا کہنا ہے کہ یہ افسوسناک واقعہ خاندانی جائیداد کے تنازع کے باعث پیش آیا۔پولیس نے کارروائی کرتے ہوئے ملزم سرور خان کو گرفتار کر لیا ہے اور واردات میں استعمال ہونے والا اسلحہ بھی برآمد کر لیا گیا ہے۔ اہل محلہ نے اس واقعے پر گہرے دکھ کا اظہار کیا اور قانون نافذ کرنے والے اداروں سے مطالبہ کیا ہے کہ مجرم کو قرار واقعی سزا دی جائے۔
