اسلام آباد(این این آئی)سرکاری ادارے سوئی ناردرن واجبات میں اربوں روپے کے نادہندہ نکلے، سوئی ناردرن کی جانب سے ادائیگی کیلئے اداروں کو نوٹس جاری کر دیا گیا۔ذرائع کے مطابق سوئی نادرن نے تمام سرکاری اداروں کو ہدایت کی ہے کہ وہ فوری طور پر اپنے بقایاجات ادا کریں تاکہ مزید قانونی کارروائی سے بچا جا سکے۔ نادہندگان کو اپریل 2025کے دوران حتمی نوٹسز بھی بھیجے جا چکے ہیں۔

ذرائع کے مطابق سرکاری اداروں پر مجموعی طور پر اربوں روپے کے واجبات واجب الادا ہیں جن میں وفاقی ہسپتالوں کے ذمے 183.62ملین روپے، خیبرپختونخوا کے ہسپتالوں کے 106.08ملین روپے، اور پنجاب کے ہسپتالوں کے 1.1228بلین روپے شامل ہیں۔تینوں صوبوں کے ہسپتالوں پر مجموعی طور پر 1.4125بلین روپے کا واجب الادا رقم ہے۔اسی طرح وفاقی پولیس پر 141.5ملین روپے اور دیگر پولیس اداروں پر مجموعی طور پر 499.7ملین روپے کے بقایاجات واجب الادا ہیں۔

اس کے علاوہ سی ڈی اے پر بھی 251.2ملین روپے کے واجبات ہیں۔سوئی ناردرن نے سرکاری اداروں کو خبردار کیا ہے کہ اگر واجبات کی ادائیگی فوری طور پر نہ کی گئی تو کمپنی قانونی کارروائی کرنے پر مجبور ہو سکتی ہے، جس کے سنگین نتائج سامنے آ سکتے ہیں۔ کمپنی نے سرکاری اداروں سے اپیل کی ہے کہ وہ بروقت ادائیگی کر کے مسائل سے بچیں اور گیس کی بلا تعطل فراہمی کو یقینی بنائیں،ملین روپے واجب الادا ہیں۔