اسلام آباد (نیوز ڈیسک) نادرا نے 18 سال سے کم عمر بچوں کی رجسٹریشن کے لیے استعمال ہونے والے “ب فارم” کے حصول کو مزید آسان بنا دیا ہے۔ یہ فارم بچوں کے پاسپورٹ، اسکول میں داخلے اور بیرون ملک سفر کے لیے لازمی ہوتا ہے۔

اب نادرا کی جانب سے شہریوں کے لیے ایک نئی سہولت متعارف کرائی گئی ہے، جس کے تحت لوگ ب فارم کے حصول کے لیے دفاتر کے باہر لمبی قطاروں میں کھڑے ہونے سے بچ سکتے ہیں۔

نادرا نے اپنے سوشل میڈیا پلیٹ فارم پر بتایا ہے کہ شہری گھر بیٹھے ب فارم کی درخواست دے سکتے ہیں۔ اس مقصد کے لیے نادرا کی “پاک آئی ڈی” موبائل ایپ استعمال کی جا سکتی ہے۔

درخواست گزار ایپ کے ذریعے بآسانی اپنی معلومات جمع کروا سکتے ہیں، اور جب فارم مکمل ہو جائے تو وہی ایپ استعمال کرتے ہوئے اسے ڈاؤن لوڈ کر کے اپنے پاس محفوظ بھی کیا جا سکتا ہے۔

نادرا نے شہریوں پر زور دیا ہے کہ وہ “پاک آئی ڈی” ایپ کو اپنے موبائل فونز پر انسٹال کر کے اس سہولت سے فائدہ اٹھائیں، تاکہ وقت اور محنت کی بچت ہو سکے۔