اسلام آباد (نیوز ڈیسک) بھارتی فلم انڈسٹری سے تعلق رکھنے والی معروف اداکارہ شانتی پریا نے حال ہی میں اپنا سر منڈوا کر سب کو حیران کر دیا۔

شانتی پریا، جو بالی وڈ کے ساتھ ساتھ تامل اور دیگر علاقائی فلموں میں بھی اداکاری کر چکی ہیں، نے 1991 میں اکشے کمار کے ساتھ فلم سوگندھ کے ذریعے بالی وڈ میں قدم رکھا تھا اور اس کے بعد متعدد فلموں میں اہم کردار ادا کیے۔

اب اداکارہ نے نہ صرف بال منڈوائے بلکہ اپنے مرحوم شوہر کا کوٹ پہن کر ایک فوٹو شوٹ بھی کروایا، جس کی تصاویر انہوں نے اپنے سوشل میڈیا اکاؤنٹ پر شیئر کیں۔ ان تصاویر نے مداحوں کو چونکا دیا اور مختلف ردعمل سامنے آنے لگے۔

اپنے پیغام میں اداکارہ کا کہنا تھا کہ انہوں نے حال ہی میں اپنے بالوں کو الوداع کہا اور یہ تجربہ ان کے لیے نہایت مثبت ثابت ہوا۔ ان کے بقول، “ایک عورت ہونے کے ناطے ہم خود کو کئی معاشرتی پابندیوں میں قید کر لیتے ہیں، لیکن اس تبدیلی کے ذریعے میں نے خود کو آزاد محسوس کیا۔ میں کوئی باغی نہیں، بس اپنی آزادی کا جشن منا رہی ہوں۔”

انہوں نے مزید لکھا کہ وہ ان روایتی خوبصورتی کے معیار کو توڑنے کا ارادہ رکھتی ہیں جو معاشرہ خواتین پر مسلط کرتا ہے۔

شانتی پریا کے اس قدم پر سوشل میڈیا پر ملا جلا ردعمل دیکھنے میں آیا—کچھ صارفین نے ان کے حوصلے کو سراہا، جب کہ کچھ نے ان پر تنقید بھی کی۔