اسلام آباد(این این آئی)نیپرا نے ماہانہ فیول چارج ایڈجسٹمنٹ کے تحت ملک بھر کے صارفین کیلئے بجلی کی قیمتوں میں کمی کا اعلان کردیاہے۔سرکاری نوٹیفکیشن کے مطابق، قومی اوسط فیول چارجز ایڈجسٹمنٹ میں 2.1240روپے فی یونٹ کمی کی گئی ہے، جس سے ایندھن کی اصل قیمت 10.8860روپے فی کلو واٹ ہو گئی ہے، جو پہلے 13.0100روپے فی کلو واٹ کی شرح سے تھی۔نوٹیفکیشن کے مطابق کراچی کے صارفین کے لیے بجلی کے نرخوں میں3روپے فی یونٹ جبکہ ملک کے دیگر حصوں کے صارفین کے لیے بجلی کے نرخوں میں2روپے 12پیسے فی یونٹ کمی کی گئی ہے۔

نیپرا نے ماہانہ ایڈجسٹمنٹ میں بجلی کی قیمت میں کمی کے نوٹیفکیشنز بھی جاری کردئیے ہیں۔نوٹیفکیشن کے تحت صارفین کو بجلی کی قیمتوں میں کمی کا ریلیف مارچ کے بلوں میں ملے گا۔نوٹیفکیشن کے مطابق کے الیکٹرک کے لیے بجلی دسمبر2024کی ماہانہ ایڈجسٹمنٹ میں سستی کی گئی جبکہ باقی ملک کیلئے جنوری 2025کی ایڈجسٹمنٹ میں بجلی کی قیمت میں کمی کی گئی۔