اسلام آباد (نیوز ڈیسک )متحدہ عرب امارات کے رہائشی 2020ءمیں ابوظہبی اور دبئی کا فاصلہ (150کلومیٹر) صرف 15 منٹوں میں طے کر سکیں گے جبکہ بیجنگ سے نیویارک کا سفر صرف دو گھنٹے پر محیط ہوگا۔ اس امر کا انکشاف ماہر طبعیات اور معروف کاروباری شخصیت انجینئر پیٹر ڈیامنڈس نے کیا ہے۔ انجینئر پیٹر ڈیامنڈس نے واضح کیا کہ ایسا ہائپر لوپ ٹکنالوجی کو بروئے کار لا کر ممکن بنایا جائے گا۔ مقناطیسی ٹیوبز ٹیکنالوجی میں چیزیں 1220 کلومیٹر فی گھنٹہ کی رفتار سے سفر کریں گی۔ اس نئی ایجاد پر امریکا میں کام ہو رہا ہے۔ اماراتی اخبار “البیان” میں شائع ہونے والے انجنئیر پیٹر کے بیان کے مطابق دبئی شہر مستقبل کے شہروں کی قیادت کے لئے سب سے زیادہ اہل شہر ہے کیونکہ یہاں ہر شعبے میں سامنے آنے والی ندرت فکر کو ہاتھوں ہاتھ لیا جاتا ہے، اس ضمن میں کسی قسم کے تعصب کا مظاہرہ نہیں کیا جاتا۔ ہائپر لوپ مواصلات کا نیا اسلوب سے جس میں چیزیں آواز کی رفتار سے تیز سفر کرتی ہیں۔ اس ٹیکنالوجی کو بروئے کار لا کر نیویارک اور بیجنگ کے درمیان فاصلہ دو گھنٹوں میں طے ہو سکے گا۔ منصوبے کے مطابق اس تیز رفتار مواصلاتی میڈیم پر تجربات کا آغاز اگلے سال کیلیفورنیا سے ہو رہا ہے۔