واشنگٹن (این این آئی )امریکی صدر ڈونلڈ ٹرمپ کے اقتدار سنبھالنے کے بعد پہلے ہفتے میں امریکا نے 7 ہزار 3 سو غیرقانونی امیگرینٹس کو گرفتار کرکے ملک بدر کردیا ہے۔میڈیارپورٹس کے مطابق ملک بدر کئے گئے افراد میں چند پاکستانی بھی شامل ہیں، زیادہ تر افراد پرتشدد واقعات میں ملوث افراد تھے۔ ہوم لینڈ سیکیوریٹی کے محکمہ کے مطابق ادارے نے غیرقانونی امیگرینٹس کیخلاف کریک ڈاون سے متعلق صدر ٹرمپ کے وعدے پر عمل کیا ہے۔ رپورٹس کے مطابق یہ کارروائیاں شکاگو، سی ایٹل، اٹلانٹا، بوسٹن، لاس اینجیلس اور نیوآرلینز سمیت مختلف شہروں میں کی گئی ہیں۔

صرف 27 جنوری کو 956 غیرقانونی امیگرینٹس کو گرفتار کیا گیا، یہ چھاپے اسکولوں اور گرجاگھروں میں بھی مارے گئے ۔ امریکی میڈیا کے مطابق گرفتاریوں کے ڈر سے بعض غیرقانونی امیگرینٹس نے کام پر جانا اور بچوں کو اسکول بھیجنا تک چھوڑ دیا ہے۔گرفتار افراد کی تعداد کا اندازہ اس بات سے لگایا جاسکتا ہے کہ سن 2024 میں صدر بائیڈن کے آخری سال اقتدار میں صرف 310 افراد کو گرفتار کیا گیا تھا۔امریکا کی ہوم لینڈ سیکیورٹی کی وزیر کرسٹی نوئم کا کہنا ہے کہ سڑکوں سے گند کے ڈھیر صاف کیے جائیں گے۔ وائٹ ہاوس کی پریس سیکریٹری نے بریفنگ میں بتایا کہ 97 فیصد ایسے افراد ڈیپورٹ کیے گئے جنہیں بائیڈن دور میں بیدخلی کاحکم دیاگیاتھا۔پریس سیکریٹری نے کہا کہ بائیڈن دور میں قانون کی خلاف ورزی کی جارہی تھی جو اب نہیں کی جارہی۔