اسلام آباد (نیوز ڈیسک) مشہور گلوکارہ اور اداکارہ سلینا گومز نے امریکی صدر ڈونلڈ ٹرمپ کی امیگریشن پالیسی پر افسوس کا اظہار کرتے ہوئے ایک جذباتی ویڈیو سوشل میڈیا پر شیئر کی، جو تیزی سے وائرل ہوگئی۔سلینا گومز نے انسٹاگرام اسٹوری میں ایک ویڈیو پوسٹ کی، جس میں وہ اپنے ہم وطنوں کو امیگریشن پالیسی کی سختیوں کی وجہ سے مشکلات میں مبتلا دیکھ کر آبدیدہ ہوگئیں۔ 32 سالہ اداکارہ نے اس ویڈیو کے ساتھ میکسیکن جھنڈے کا ایموجی اور “مجھے افسوس ہے” کا کیپشن بھی لکھا۔

اپنے پیغام میں سلینا نے امیگریشن کے بحران پر اپنی بے بسی ظاہر کرتے ہوئے کہا کہ ان کے لوگ، خاص طور پر خواتین اور بچے، ان پالیسیوں کا نشانہ بن رہے ہیں۔ انہوں نے کہا، “میں چاہ کر بھی کچھ نہیں کر پا رہی، مگر اپنی پوری کوشش ضرور کروں گی۔”یہ ویڈیو کچھ دیر بعد ان کے اکاؤنٹ سے ڈیلیٹ کردی گئی، تاہم تب تک یہ وائرل ہوچکی تھی۔ بعد میں سلینا نے ایک اور پیغام میں کہا، “شاید دوسروں کے لیے ہمدردی دکھانا بھی غلط سمجھا جاتا ہے۔” ان کا یہ بیان ان پر ہونے والی تنقید کا جواب معلوم ہوتا تھا۔یہ پوسٹ ایسے وقت میں سامنے آئی جب امیگریشن اینڈ کسٹمز انفورسمنٹ (ICE) کے حالیہ آپریشن میں صرف تین دنوں میں 956 افراد کو گرفتار کیا گیا تھا۔

سلینا گومز امیگریشن کے حقوق کی ایک سرگرم حمایتی رہی ہیں اور 2019 میں نیٹ فلکس کی ڈاکیوسیریز “Living Undocumented” پروڈیوس کر چکی ہیں، جس میں انہوں نے اپنے خاندان کی امیگریشن کہانی دنیا کے سامنے رکھی تھی۔ اس سیریز میں انہوں نے اپنے والد، دادا اور دادی کے امریکہ پہنچنے کے سفر کا احوال بیان کیا تھا۔