پشاور (این این آئی) خیبرپختونخوا حکومت نے صوبے بھر کے تمام 80چرچز کو فی کس پانچ لاکھ روپے دینے کا اعلان کردیا۔وزیراعلی ہائوس سے جاری بیان کے مطابق وزیر اعلی علی امین گنڈاپور کی زیر صدارت صوبائی کابینہ کا اجلاس ہوا جس میں وزیراعلی علی امین گنڈاپور نے کرسمس کے موقع پر صوبے بھر کے چرچوں کیلئے چار کروڑ روپے کی خصوصی گرانٹ کا اعلان کردیا۔

کابینہ نے فیصلہ کیا کہ کرسمس کے موقع پر صوبے میں قائم 80چرچز کو فی چرچ پانچ لاکھ روپے دیے جائیں گے۔وزیراعلی نے کہا کہ یہ رقم فوری طور پر چرچز کو جاری کی جائے، صوبائی حکومت مسیحی برادری کی خوشیوں میں برابر کی شریک ہے۔ دوسری جانب مشیر اطلاعات بیرسٹر سیف نے بتایا ہے کہ کرسمس کے موقع پر تمام چرچز کو مالی تحفہ دینے کا فیصلہ کیا گیا ہے، صوبے بھر کے چرچز کو کرسمس کے موقع پر 5لاکھ روپے بطور تحفہ فراہم کیے جائیں گے، یہ فیصلہ اقلیتوں کے ساتھ یکجہتی کے لیے کیا گیا ہے۔