لاہور ( این این آئی)حکومت پنجاب نے صوبہ بھر میں دفعہ 144نافذ کر دی، ہر قسم کے احتجاج، جلسے، جلوس، ریلیوں، دھرنوں اور ایسی تمام سرگرمیوں پر پابندی عائد ہو گی ۔ ترجمان محکمہ داخلہ پنجاب کے مطابق حکومت پنجاب نے صوبے میں 3دن کے لئے دفعہ 144نافذ کی،پابندی کا اطلاق ہفتہ 23نومبر سے سوموار 25نومبر تک ہو گا۔

کابینہ کمیٹی برائے امن و امان کے 18ویں اجلاس میں دفعہ 144کے نفاذ کی سفارش کی گئی تھی۔ دفعہ 144کے نفاذ کا فیصلہ امن و امان کے قیام، انسانی جانوں اور املاک کے تحفظ کیلئے کیا گیا، سکیورٹی خطرات کے پیش نظر کوئی بھی عوامی جلوس دہشت گردوں کیلئے سافٹ ٹارگٹ ہو سکتا ہے۔شرپسند عناصر عوامی اجتماع کی آڑ میں ریاست مخالف سرگرمیوں سے اپنے مذموم مقاصد حاصل کر سکتے ہیں ۔ محکمہ داخلہ نے صوبہ بھر میں دفعہ 144 کے نفاذ کا نوٹیفکیشن جاری کر دیا۔