اسلام آباد (نیوزڈ یسک) پاکستان میں امتحانات کے لیے نیا گریڈنگ سسٹم متعارف کروا دیا گیا ہے۔ وزارت تعلیم نے اس حوالے سے اعلامیہ جاری کیا، جس کے تحت اب امتحانات کے نتائج نمبروں کی بجائے گریڈز کی بنیاد پر دیے جائیں گے۔یہ نیا نظام 2024 کے تعلیمی سال سے نافذ ہوگا، اور ابتدائی طور پر نویں اور گیارہویں جماعت میں لاگو کیا جائے گا۔

گریڈز کی پیمائش کے لیے اب گریڈ پوائنٹ ایوریج (جی پی اے) یا سی جی پی اے کا استعمال ہوگا۔اعلامیے کے مطابق انٹربورڈ کمیٹی آف چیئرمین نے ثانوی اور اعلیٰ ثانوی سطح پر 10 پوائنٹس پر مشتمل نیا گریڈنگ سسٹم متعارف کرایا ہے، جس میں اے پلس پلس، اے پلس، اے، بی پلس پلس، بی پلس، بی، سی، ڈی، ای اور یو گریڈ شامل ہیں۔ امتحانات میں پاس ہونے کے لیے کم از کم نمبر 33 فیصد سے بڑھا کر 40 فیصد کر دیے گئے ہیں۔نئے گریڈنگ سسٹم کا اطلاق 2025 سے کالجز اور یونیورسٹیوں میں بھی ہوگا، جبکہ وفاق، سندھ، بلوچستان، اور گلگت بلتستان نے اس پالیسی کا نفاذ شروع کر دیا ہے۔