ماسکو (این این آئی)روس نے 6 برطانوی سفارت کاروں کو ملک بدر کردیا۔غیر ملکی میڈیا کی خبر کے مطابق روس نے یوکرائن جنگ میں بڑھتی مداخلت کے تناظر میں برطانیہ کے 6 سفارتکاروں کے اجازت نامے واپس لے کر انہیں ملک بدر کردیا۔

روسی میڈیا کے مطابق جن سفیروں کے اجازت نامے واپس لئے گئے ان پر جاسوسی کا الزام ہے اور ان کی سرگرمیوں سے ملکی سلامتی کو خطرہ تھا۔دوسری جانب روسی صدر پیوٹن نے اپنے ایک بیان میں کہا ہے کہ اگر نیٹو نے یوکرائن کو مغربی ساختہ دور مار میزائلوں کو روس کے خلاف استعمال کرنے کی اجازت دی تو اسے نیٹو کی روس سے جنگ سمجھا جائے گا اور پھر ہم اس حوالے سے مناسب فیصلہ لیں گے۔ علاوہ ازیں ماسکو میں قائم برطانوی سفارت خانے اور برطانوی حکومت نے اب تک اپنے سفیروں کا نکالے جانے پر کوئی ردعمل نہیں دیا۔