لاہور ( این این آئی) پاکستانی شوبز انڈسٹری کے معروف ڈرامہ نگار خلیل الرحمان قمر کو ہنی ٹریپ کے بعد اغوا کرنے کے کیس کے مرکزی ملزم حسن شاہ کی گرفتاری کے لئے آرگنائزڈ کرائم یونٹ ماڈل ٹائون پولیس کی جانب سے چھاپے مارے جا رہے ہیں۔
ذرائع کے مطابق پولیس نے ملزم حسن شاہ کا نام ای سی ایل میں ڈال دیا ہے، بیرون ملک فرار کی کوشش پر ملزم کا نام ایل سی ایل میں ڈالا گیا۔پولیس کا کہنا ہے کہ مقدمے میں دفعہ 365اے بھی شامل کردی گئی ، ملزم حسن شاہ نے آمنہ عروج اور ساتھیوں کی مدد سے خلیل الرحامن قمر کو اغوا کیا تھا۔ملزم نے خلیل الرحمان قمر سے ایک کروڑ تاوان کا مطالبہ کیا تھا، ملزمہ آمنہ عروج سمیت گروہ آٹھ ملزمان کو آرگنائزڈ کرائم یونٹ ماڈل ٹائون پولیس گرفتار کرچکی ہے۔
