لندن (این این آئی)قومی کرکٹ ٹیم کے سابق کپتان اور مایہ ناز آل رانڈر شاہد خان آفریدی نے کہا ہے کہ کپتان بنانے کا اختیار سلیکشن کمیٹی کے پاس ہونا چاہیے۔میڈیا سے گفتگو میں شاہد آفریدی نے کہا کہ ورلڈ کپ میں پاکستان ٹیم کی پرفارمنس اچھی نہیں رہی، دیکھتے ہیں چیئرمین پی سی بی ٹیم میں کیا سرجری کرتے ہیں۔انہوں نے کہا کہ اصل بیماری کی جڑ گراس روٹ لیول کی کرکٹ ہے، جس میں سرجری کی ضرورت ہے۔سابق کپتان نے کہا کہ گراس روٹ لیول کی کرکٹ کی بہتری کیلئے ہمیشہ دستیاب ہوں۔
انہوں نے کہاکہ پی سی بی کا چیف ایگزیکٹیو وزیراعظم کو نہیں ہونا چاہیے، الگ سے بورڈ ہونا چاہیے جو چیئرمین پی سی بی کا انتخاب کرے۔شاہد آفریدی نے کہا کہ کپتان بنانے کا اختیار بھی سلیکشن کمیٹی کے پاس ہونا چاہیے، کپتان کا رول اہم ہوتا ہے۔انہوں نے کہا کہ جو باڈی لینگویج کپتان کی ہوتی ہے وہی کھلاڑیوں کی ہوجاتی ہے، روہیت شرما کو دیکھ لیں کتنا پراعتماد کھیلتے ہیں، وہی انداز تمام کھلاڑی اپناتے ہیں۔
