لاہور( این این آئی)این اے 122ضمنی انتخاب کو پاکستان کی سیاسی تاریخ کا سب سے مہنگا الیکشن قرار دیا جارہا ہے ، جیت کے لئے پانی کی طرح بہائے جانے والے پیسے سے بیروزگار نوجوان اور دیہاڑی دار مزدوربھی مستفید ہو رہے ہیں۔تفصیلات کے مطابق اپوزیشن کی سب سے بڑی جماعت پی ٹی آئی اور حکمران جماعت مسلم لیگ (ن) این اے 122کی نشست جیتنے کے لئے ایڑھی چوٹی کا زور لگا رہی ہے اور اس کے لئے انتخابی ضابطہ اخلاق کی پرواہ کئے بغیر اخراجات کئے جارہے ہیں۔ اپنی عددی برتری ثابت کرنے کےلئے پورے حلقے میں چند فٹ کے فاصلے پر ایک دوسرے کے مقابلے میں انتخابی دفاتر قائم کئے گئے ہیں جہاں سپورٹروں کی شکل میں بیروزگار نوجوان ہر وقت موجود رہتے ہیں۔ ذرائع کے مطابق حلقے کے بیروزگار نوجوانوں کی آج کل پانچوں انگلیاں گھی میں ہیں جو نہ صرف پارٹی دفاتر میں موجود رہنے ، ریلیوں اور جلسوں میں شرکت کا بھی معاوضہ وصول کر نے کے ساتھ مزید ار کھانوں ،چائے اور کولڈرنکس پر بھی ہاتھ صاف کر رہے ہیں۔ دوسری طرف روزانہ اجرت پر کام کرنے والے مزدور بھی کام نہ ملنے پر حلقے میں پہنچ جاتے ہیں اور انہیں بھی کھانے کے ساتھ معاوضے کی ادائیگی کی جارہی ہے۔

مزید پڑھئے:عہد ساز شخصیت نیلسن منڈیلا