اسلام آباد (این این آئی)نگران حکومت نے سوشل میڈیا سائٹ ایکس کی بحالی کے فیصلے کو آنیوالی حکومت پر چھوڑنے کا فیصلہ کرلیا۔ تفصیلات کے مطابق نگران حکومت نے سوشل میڈیا سائٹ ایکس کی بحالی کے فیصلے کو آنیوالی حکومت پر چھوڑنے کا فیصلہ کیا ہے۔حکومتی ذرائع کے مطابق پاکستان میں ایکس کو بلاک کرنے کا فیصلہ پلیٹ فارم کی جانب سے مقامی ضوابط، خاص طور پر غیر قانونی مواد کی موجودگی سے نمٹنے کیلئے مبینہ طور پر عدم تعمیل کی وجہ سے کیا گیا۔
رپورٹ کے مطابق متنازع مواد کو ہٹانے کا معاملہ حل کرنے کی کچھ کوششوں کے باوجود ایسے مواد کے صرف چھوٹے حصے سے موثر طریقے سے نمٹا گیا جس وجہ سے حکومت کارروائی پر مجبور ہوئی۔پی ٹی اے نے ایکس کی ممکنہ بحالی سے متعلق انکوائریاں وزارت داخلہ کو بھیج دی ہیں، تاہم اب تک اس معاملے پر وزارت داخلہ کی طرف سے کوئی سرکاری ردعمل سامنے نہیں آیا ہے۔دریں اثنا، اس جاری خلل کے درمیان، پاکستان میں بہت سے سوشل میڈیا صارفین نے پابندیوں کو نظرانداز کرنے اور ایکس تک رسائی حاصل کرنے کے لیے ورچوئل پرائیویٹ نیٹ ورکس کا سہارا لیا ہواہے۔
