اسلام آباد(نیوزڈیسک))پاکستان میں سعودی سفیر عبداﷲ مرزوق الزہرانی نے کہا ہے کہ خادم حرمین الشریفین نے سانحہ منیٰ کی تحقیقات کا حکم دیا ہے اور تحقیقات مکمل ہونے کے بعد اس کا اعلان کیا جائے گا۔ سچ کے متلاشیوں کو زیب نہیں دیتا کہ وہ بدنیتی پر مبنی افواہوں پر کان دھریں یا ایسی سنی سنائی باتوں کو سچ مان لیں جن کا مقصد رائے عامہ کو گمراہ کرنا ہے۔ انہوں نے یہ بات چیئرمین سینیٹ رضا ربانی سے ملاقات میں کہی۔ سعودی سفارت خانہ کی طرف سے جاری بیان کے مطابق ملاقات میں دونوں شخصیات نے دوطرفہ برادرانہ تعلقات میں بہتری اور تقویت پر اطمینان کا اظہار کیا۔ اس موقع پر سعودی سفیر نے منیٰ حادثہ میں جاں بحق ہونے والے حجاج کرام کی وفات پر تعزیت اور زخمیوں کی جلد صحت یابی کی دعا کی۔ سعودی سفیر نے سعودی حکومت کی جانب سے اس سال اور گزشتہ برسوں میں مناسک حج کو پرامن اور آسان بنانے کے لئے کئے گئے اقدامات اور فراہم کردہ سہولیات کا ذکر کرتے ہوئے کہا کہ سعودی حکومت کی لاتعداد خدمات کو سیاسی مقاصد کے لئے حادثہ کو استعمال کرنے والوں کی وجہ سے بے وقعت نہیں کیا جا سکتا۔ سعودی سفیر نے اس امر کا اعادہ کیا کہ سعودی عرب نے تمام متعلقہ ممالک کی حکومتوں کو یہ سہولت فراہم کی کہ وہ آ کر اپنے شہداءکی شناخت کریں اور اپنے زخمیوں کی صحت و علاج کے بارے میں تسلی کرلیں۔چیئرمین سینیٹ میاں رضا ربانی نے پاکستان میں سعودی عرب کے سفیر عبداﷲ ایم الزہرانی سے گفتگو کرتے ہوئے اس یقین کا اظہار کیا ہے کہ منیٰ حادثہ میں شہید، زخمی اور لاپتہ ہونے والے پاکستانیوں کے حوالے سے سعودی حکومت معاملات کو ترجیحی بنیادوں پر دیکھے گی۔ جمعہ کو پاکستان میں سعودی عرب کے سفیر عبداﷲ ایم الزہرانی نے چیئرمین سینیٹ میاں رضا ربانی سے ملاقات کی جس میں دونوں ممالک کے درمیان دوطرفہ تعلقات اور منیٰ حادثہ کے حوالے سے تفصیلی تبادلہ خیال کیا گیا۔ چیئرمین سینیٹ میاں رضا ربانی نے سعودی سفیر سے گفتگو کرتے ہوئے کہا کہ دونوں ممالک کے تاریخی، ثقافتی، مذہبی تعلقات ہیں اور انہوں نے اس بات پر زور دیا کہ دونوں ممالک کے پارلیمانی وفود کے درمیان قریبی باہمی رابطوں کو مزید تقویت دی جائے۔ چیئرمین سینیٹ میاں رضا ربانی نے سعودی شوریٰ کے سربراہ کو سینیٹ اجلاس کے دوران خصوصی شرکت کی دعوت بھی دی۔ واضح رہے کہ چیئرمین سینیٹ نے سانحہ منیٰ کے حوالے سے وفاقی وزیر مذہبی امور سردار یوسف اور خصوصی مشیر خارجہ سرتاج عزیز کو سینیٹ کے 5 اکتوبر کو شروع ہونے والے اجلاس میں صورتحال کی وضاحت کے لئے خطوط بھی لکھے ہیں۔