کراچی (این این آئی)ڈائریکٹر جنرل پاسپورٹس پاکستان مصطفی جمال قاضی نے کہا ہے کہ سال 2023 میں اب تک 65 لاکھ پاسپورٹ جاری کیے جاچکے ہیں۔میڈیا سے گفتگو میں انہوںنے کہاکہ سال 2027 سے پاکستان میں ای پاسپورٹ کا اجرا لازمی ہوجائیگا اس سلسلے میں تمام ضروری انتظامات مکمل کر لیے گئے ہیں۔ ڈی جی پاسپورٹس نے کہا کہ حالیہ رائج مشین ریڈایبل پاسپورٹ کو ای پاسپورٹ پر منتقل کرنے کا کام جاری ہے جس کے لیے نیا سسٹم آئندہ 6 سے 7 ماہ میں انسٹال کردیا جائے گا جبکہ سال 2027 میں ای پاسپورٹ لازمی ہو جائے گا۔

ایک سوال کے جواب میں انہوں نے کہا کہ اعلی سطحی ٹاسک فورس افغانیوں کو جاری کیے گئے 12 ہزار پاکستانی پاسپورٹ کی تحقیقات کر رہی ہے۔ مصطفی جمال قاضی نے بتایا کہ پاکستانی پاسپورٹ کے اجرا میں تاخیر کا مسئلہ حل کرلیا گیا ہے۔ پاسپورٹ کی پرنٹنگ کے لیے درکار لیمینیشن پیپر کی وافر مقدار حاصل کرلی گئی ہے جس کے بعد پاسپورٹ کا اجرا معمول پر آگیا ہے۔