لاہور( این این آئی)شدید دھند کی وجہ سے موٹر ویز کے کئی سیکشنز ٹریفک کے لئے بند رکھے گئے جس کی وجہ سے مسافروںکو مشکلات کا سامنا کرنا پڑا۔گزشتہ روز بھی ملک کے مختلف علاقوں میں دھند کا راج رہا اور کئی مقامات پر حد نگاہ انتہائی کم ہو گئی ہے، جس کے باعث موٹر ویز کے کئی سیکشنز بند رکھی گئی ۔موٹروے ایم فور شیرشاہ سے فیصل آباد تک ،موٹروے ایم تھری سمندری سے درخانہ تک اور لاہور سیالکوٹ موٹروے کو دھند کی وجہ سے بند رکھا گیا۔

دھند چھٹنے کے بعد قومی شاہراہ کو مرحلہ وار کھول دیا گیا ۔موٹر وے پولیس نے شہریوں کو دوران سفر احتیاطی تدابیر اختیار کرنے کی ہدایت کرتے ہوئے کہا ہے کہ موٹر ویز کو عوام کی حفاظت اور محفوظ سفر یقینی بنانے کے لیے بند کیا جاتا ہے۔موجودہ صورتحال میں عوام کو غیر ضروری سفر اور تیز رفتاری سے گریز کرنے، دوران ڈرائیونگ فوگ لائٹس استعمال کرنے اور اگلی گاڑی سے مناسب فاصلہ رکھنے کی ہدایت کی ہے۔ترجمان نے کہا کہ دوران سفر کسی بھی صورتحال میں معلومات اور مدد کے لیے ہیلپ لائن 130 سے رابطہ کریں۔