اسلام آباد (این این آئی)نگران وفاقی حکومت نے بیرون ملک ملازمت کیلئے 6نئے پروٹیکٹوریٹ آفس کھولنے کا اعلان کیا ہے۔تفصیلات کے مطابق نگران وفاقی حکومت نے ملک بھر میں تارکین وطن کیلئے چھ نئے پروٹیکٹوریٹ دفاتر کھولنے کا اعلان کیا ہے تاکہ پاکستانی شہریوں کو بیرون ملک روزگار کے مواقع فراہم کیے جاسکیں۔اس کے علاوہ افراد کیلئے اپنے شناختی کارڈ یا ڈومیسائل کے ساتھ اسی شہر سے پروٹیکٹوریٹ حاصل کرنے کی شرط ختم کردی گئی ہے ، جس سے وہ ملک بھر میں کسی بھی دفتر تک رسائی حاصل کرسکتے ہیں۔

نئے دفاتر سکھر، ایبٹ آباد، گوادر، آزاد جموں و کشمیر، اسلام آباد اور گلگت بلتستان میں قائم کیے جائیں گے جس کے بعد دفاتر کی مجموعی تعداد 15ہو جائے گی۔ اس توسیع سے بیرون ملک روزگار کے متلاشی افراد، خاص طور پر دور دراز علاقوں میں رہنے والے افراد کی رسائی میں نمایاں بہتری آئے گی۔اس وقت کراچی، لاہور، پشاور، راولپنڈی، کوئٹہ، ملتان، مالاکنڈ، ڈی جی خان اور سیالکوٹ میں پروٹیکٹوریٹس پہلے سے ہی موجود ہیں۔