اسلام آباد(این این آئی)اسلام آباد ہائیکورٹ نے پیمرا فیصلے کے خلاف سینئر صحافی عاصمہ شیرازی کی اپیل کا فیصلہ سنا دیا۔ عدالت نے غلط خبر نشر کرنے پر نجی چینل کو سینئر صحافی عاصمہ شیرازی سے معافی مانگنے کا حکم دے دیا۔14صفحات پر مبنی فیصلہ جسٹس محسن اختر کیانی نے تحریر کیا ہے جس میں کہا گیا کہ سینئر صحافی عاصمہ شیرازی سے متعلق غلط خبر نشر کرنے پر نجی چینل معافی نامہ نشر کرے۔اسلام آباد ہائیکورٹ نے نجی چینل کو سینئر صحافی عاصمہ شیرازی کو 50ہزار جرمانہ دینے کا حکم بھی دے دیا۔
عدالت نے کہا کہ عاصمہ شیرازی چاہیں تو نجی چینل پر ہتک عزت کا دعویٰ بھی دائر کر سکتی ہیں، نجی چینل نے سپریم کورٹ کی خبر کے ساتھ غلط طور پر عاصمہ شیرازی کی تصویر بار بار نشر کی۔ اسلام آباد ہائیکورٹ کے مطابق پیمرا قانون کے تحت چینلز کی ذمہ داری ہے کہ خبر کو درست انداز میں نشر کیا جائے، پیمرا قانون کے مطابق کسی کے خلاف غلط، ہراسانی پر مبنی اور ہتک آمیز خبر نہیں چلائی جا سکتی۔
