کراچی (این این آئی)رہنما پیپلزپارٹی سعید غنی نے کہا ہے کہ اب ایم کیو ایم مسلم لیگ ن کے ہاتھوں استعمال ہونے جارہی ہے۔ان خیالات کا اظہار انہوںنے پیر کو کراچی میں پریس کانفرنس سے خطاب کرتے ہوئے کیا، اس موقع پر سابق ایم پی اے شیراز وحید نے پیپلزپارٹی میں شمولیت کا اعلان کردیا۔

سعید غنی نے کہا کہ ایم کیو ایم انتخابات میں مقابلہ کرے، دھمکی اور دادا گیری کا طرز عمل کسی طور پرمناسب نہیں، نگراں حکومتیں بنیں توسندھ میں بیٹھا ہرسرکاری افسرتبدیل ہوا ہے۔انہوں نے کہا کہ ایسا کوئی افسر نہیں رہا اپنی سیٹ پر، جو پی پی حکومت میں تھا، تمام افسران کی تبدیلی ہوئی یہ صرف صوبہ سندھ میں ہوا، مصطفی کمال کے دھمکی آمیز رویے کا اداروں کو نوٹس لینا چاہیے۔رہنما پیپلزپارٹی نے کہا کہ ہم تو لوگوں کوجوڑنے کی بات کرتے ہیں، ایم کیوایم ہمیشہ بہت ساری جماعتوں کے ہاتھوں استعمال ہوئی ہے، اب ایم کیو ایم مسلم لیگ ن کے ہاتھوں استعمال ہونے جارہی ہے۔