لاہور ( این این آئی) لاہور پولیس نے ملت پارک کے علاقہ سے 30لاکھ روپے تاوان کے لئے اغواء ہونے والی سیکنڈ ایئر کی طالبہ کو بازیاب کروا کے لڑکی سمیت 4ملزمان کو گرفتار کر لیا ۔ پولیس کے مطابق نامعلوم افراد نے تاجر مسعود کی بیٹی سماویہ کو اغواکیا ہے، طالبہ کو اس کا والد کالج چھوڑ کر گھر آیا تھا کہ اسے میسج آیا کہ تمہاری بیٹی کو کالج سے واپسی پر اغوا کر لیا گیا ہے۔
پولیس کے مطابق نامعلوم اغواکاروں نے تاجر مسعود سے بیٹی کی بازیابی کے لئے 30 لاکھ روپے تاوان مانگا ہے اور طالبہ کو قتل کرنے کی دھمکی بھی دی ہے۔پولیس حکام نے بتایا کہ مغویہ کے والد نے فوری طور پر متعلقہ تھانے کو اطلاع کردی اور پولیس نے نامعلوم اغوا کاروں کے خلاف مقدمہ درج کرکے تفتیش شروع کردی ہے۔ایس ایس پی انویسٹی گیشن ڈاکٹر انوش مسعود نے بتایا کہ پولیس ٹیم نے چند گھنٹوں میں ہی طالبہ کے اغوا کا معمہ حل کرلیا اور لڑکی کو بازیاب کروا کے اغوا میں ملوث چار ملزمان کو گرفتار کر لیا ۔
انہوں نے بتایا کہ لڑکی کے کلاس فیلو حمزہ نے واردات کا منصوبہ بنایا ، ملزم حمزہ نے لڑکی کو بہانے سے بلایا اور اغوا کروایا ، ملزم بائیک پر بٹھا کر لڑکی کو ساتھ لیکر گیا ، ملزمان نے کرپٹو کرنسی میں تاوان کی رقم کا مطالبہ کیا۔ واردات کرنے والوں میں ایک لڑکی امبرین بھی شامل ہے۔جن کے خلاف مقدمہ درج کر کے مزید کارروائی شروع کر دی گئی ہے۔
