ریاض(این این آئی)سعودی عرب کی عدالت نے ایک پاکستانی ڈرائیور کو خاتون کا موبائل فون چھیننے، اسے جنسی طور پر ہراساں کرنے اور اس سے سودے بازی کرنے کا جرم ثابت ہونے پر 4 سال قید کی سزا سنادی۔بین الاقوامی خبر رساں ادارے کی رپورٹ کے مطابق پاکستان سے تعلق رکھنے والے ڈرائیور کا نام امتیاز بتایا جارہا ہے، جو ہر سفر کے 60 ریال کے یومیہ کرایہ کے بدلے خاتون کو سواری فراہم کرتا تھا۔پاکستان سے تعلق رکھنے والے ڈرائیور نے خاتون کا پیچھا کیا اور اسے ہراساں کرنے کی کوشش کی، خاتون گاڑی سے نکل گئی لیکن اپنا موبائل فون بھول گئی، اور پھر ڈرائیور کو اپنے دوسرے نمبر سے فون کرکے اپنا موبائل فون مانگا۔
ڈرائیور کی جانب سے مذکورہ خاتون کو بلیک میل کیا گیا اور اس سے فون کے بدلے غیر اخلاقی فرمائش کی گئی، جبکہ امتیاز نے جنسی مفہوم کے ساتھ واٹس ایپ میسج کے ذریعے خاتون کو بلیک میل بھی کیا۔سعودی پولیس کی جانب سے پاکستانی ڈرائیور کو گرفتار کرلیا گیا ہے جس کے قبضے سے خاتون کا موبائل فون برآمد ہوا ہے۔ عدالت نے ڈرائیور کو ہراساں کرنے کے جرم کا مرتکب قرار دیتے ہوئے 4 سال قید کی سزا سنادی۔ملزم کی جانب سے مدعی کا موبائل فون لینے کی تردید کی گئی اور دعوی کیا گیا کہ وہ اسے گاڑی میں بھول گئی تھی اور وہ اسے موبائل فون پہنچانے کے لیے فون کررہا تھا۔ جبکہ جنسی پیغامات غلطی سے بھیجے گئے تھے۔
