کراچی(این این آئی)شہر قائد میں واقع سب سے بڑی سرکاری جناح اسپتال میں نامعلوم کار سوار 6 سالہ بچے کی لاش چھوڑ کر فرار ہوگئے۔اسپتال حکام نے بتایا کہ دو نامعلوم کار سوار جناح اسپتال کے ایمرجنسی وارڈ میں 6 سالہ بچے کی لاش چھوڑ کر فرار ہوگئے، جن کی بعد میں سی سی ٹی وی فوٹیج بھی سامنے آگئی۔لاش کی اطلاع پر ایم ایل او کی موجودگی میں ڈاکٹرز نے ضابطے کی کارروائی کی۔ پوسٹ مارٹم رپورٹ میں انکشاف ہوا کہ بچے کے ساتھ جنسی زیادتی کی گئی ہے۔

پوسٹ مارٹم کے دوران بچے کے جسم پر تشدد کے نشانات اور نئے و پرانے زخم بھی موجود تھے۔پولیس سرجن ڈاکٹر سمعیہ کے مطابق بچے کے کچھ حصوں کے ڈی این اے کے نمونے حاصل کرلیے گئے ہیں جبکہ وجہ موت بھی محفوظ کرلی گئی ہے۔دوسری جانب ڈی آئی جی سائوتھ اسد رضا نے دعویٰ کیا کہ بچے سے زیادتی کے شواہد نہیں ملے اور جسم پر کار حادثے میں آنے والی چوٹوں کے نشانات ہیں، پولیس نے کار حادثے میں ملوث دو ملزمان کو شناخت کرلیا ہے۔انہوں نے بتایا کہ واقعہ کار حادثے کا ہے اور مقتول کی شناخت راول کے نام سے ہوئی جو قیوم آباد کا رہائشی ہے جبکہ آبائی گاں لودھراں ہے۔