لاہور( این این آئی)سابق وزیراعظم و پاکستان مسلم لیگ (ن) کے صدر شہباز شریف سے چوہدری عابد رضا کوٹلہ کی قیادت میں گجرات سے سابق اراکین اسمبلی ، سابق ٹکٹ ہولڈرز اور پارٹی رہنمائوں نے ملاقات کی جس میں پارٹی کے تنظیمی اور انتخابات کے حوالے سے امور پر تبادلہ خیال کیا گیا ۔اس موقع پر پارٹی رہنمائوں نے شہباز شریف کو اپنے علاقوں میں انتخابی تیاریوں اور انتظامات کے حوالے سے آگاہ کیا۔ شہباز شریف نے کہا کہ عوام مطمئن ہیںکہ نواز شریف ملک کو بحرانوں سے نکالنے کے لئے آ گئے ہیں، قوم نے چار سیاہ برسوں میں مہنگائی، بیروزگاری اور معاشی تباہی کا چلا کاٹا، مہنگائی کی خزاں سے نجات اور آسانیوں کی بہار کا موسم جلد پھر شروع ہوگا، نواز شریف کی قیادت میں پورا پاکستان متحد اور یکسو ہے۔
انہوں نے کہا کہ اللہ تعالی کے فضل وکرم سے پاکستان پھر ترقی کرے گا، صنعت اور تجارت کا پہیہ چلے گا، غریب کا چولہا جلے گا، وزیراعظم نواز شریف کے آنے سے غریبوں کی امیدیں پھر سے جاگی ہیں، غریبوں کو پہلے مایوس کیا نہ آئندہ کریں گے، نواز شریف کی قیادت میں ملک کو معاشی خود انحصاری کی منزل سے ہم کنار کریں گے۔ملاقات کرنے والوں میں چوہدری عابد رضا، نوابزادہ طاہر الملک، راجہ اسلم خان، نوابزادہ غضنفر علی گل، چوہدری علیم اللہ وڑائچ، چوہدری جعفر اقبال اور دیگر شامل تھے۔
