اسلام آباد (نیوز ڈیسک) ایف بی آر کے ترجمان سینئر ممبر ان لینڈ ریونیو پالیسی شاہد حسین اسد نے کہا ہے کہ جولائی اگست کے ودہولڈنگ ٹیکس گوشوارے 8 اکتوبر تک جمع ہو سکیں گے ۔جبکہ سالانہ انکم ٹیکس گوشوارے جمع کرانے کی آخری تاریخ انکم ٹیکس آرڈیننس 2001ئ کے تحت 30 ستمبر ہے اور یہی آخری تاریخ رہے گی۔جنگ رپورٹر حنیف خالد کے مطابق اس میں کسی قسم کی توسیع زیرغور نہیں۔ وہ جنگ سے گفتگو کر رہے تھے۔ ایف بی آر کے ترجمان نے ملک بھر کے سالانہ آمدن ٹیکس گوشوارے جمع نہ کرانے والوں کو ان کے وسیع تر مفاد میں مشورہ دیا ہے کہ وہ اپنے سالانہ ٹیکس گوشوارے آج اور کل میں جمع کرا کر نان فائلر سے فائلر بن جائیں اور خود کو ودہولڈنگ ٹیکس سے مستثنیٰ قرار دلائیں۔ انہوں نے کہا کہ انکم ٹیکس کے گذشتہ سال کے گوشوارے میں کوئی قابل ذکر (بنیادی) تبدیلی نہیں کی گئی ہے۔ لہٰذا سالانہ آمدنی ٹیکس گوشوارے اور اثاثہ جات کے ڈیکلریشن جمع کرانے کی آخری تاریخ 30 ستمبر میں توسیع کئے جانے کا کوئی جواز نہیں ہے۔ انہوں نے کہا کہ کیونکہ ودہولڈنگ ٹیکس کی سٹیٹمنٹ کا نیا نظام حال ہی میں لاگو کیا گیا ہے۔ لہٰذا اس کا گوشوارہ جمع کرانے کی آخری تاریخ جو پہلے 15 اگست سے بڑھا کر 15 ستمبر 2015ءکی گئی تھی اور پھر ٹیکس گزاروں کے اصرار پر 28 ستمبر 2015ءکیا گیا تھا۔ اب بعض ٹیکس گزاروں کے اس مطالبے پر کہ حج اور عید الاضحی کی تعطیلات کی وجہ سے وہ 28 ستمبر تک ودہولڈنگ ٹیکس گوشوارے جو ہر ماہ جمع کرانا ہوتا ہے 28 ستمبر تک جمع نہیں کرا سکے لہٰذا ایف بی آر نے ان ٹیکس گزاروں کو سہولت دینے کے لئے جولائی اور اگست 2015ءکے ودہولڈنگ ٹیکس جمع کرانے کی آخری تاریخ کو 8 اکتوبر 2015ءتک بڑھا دیا ہے۔