غزہ(این این آئی)غزہ کی پٹی میں 7اکتوبر سے جاری اسرائیلی حملوں سے شہید ہونے والے فلسطینیوں کی تعداد 8ہزار 525تک پہنچ گئی ہے۔غیر ملکی میڈیا رپورٹس کے مطابق ترجمان وزارتِ صحت غزہ اشرف القدرہ کا کہنا ہے کہ ساڑھے 8 ہزار سے زائد شہید ہونے والوں میں 3ہزار 542بچے جبکہ 2ہزار 187خواتین شامل ہیں جبکہ ساڑھے 21ہزار افراد زخمی ہیں۔

انہوں نے بتایا کہ 2ہزار سے زائد افراد تاحال ملبے تلے دبے ہوئے ہیں جن میں 1100بچے بھی شامل ہیں۔ترجمان وزارت صحت غزہ کا کہنا ہے کہ اسرائیلی فضائی حملوں میں طبی عملے کے130افراد مارے جا چکے ہیں جبکہ25ایمبولینسیں تباہ ہو چکی ہیں۔انہوں نے بتایا کہ قابض اسرائیلی افواج نے 15اسپتالوں اور 32بنیادی نگہداشت کے مراکز کو نشانہ بنایا جبکہ 57طبی سہولتیں فراہم کرنے والے مراکز کو بھی نشانہ بنایا گیا۔ترجمان کے مطابق ایندھن کی عدم فراہمی کے باعث غزہ سٹی کے الشفا اسپتال اور شمالی غزہ میں انڈونیشین اسپتال کے مرکزی جنریٹر بند ہو جائیں گے جس سے اموات میں خطرناک حد تک اضافے کا خدشہ ہے۔