غزہ (این این آئی)غزہ میں اسرائیل کے وحشیانہ حملوںمیں7 اکتوبر سے جاری اسرائیلی بمباری سے اب تک 31 مساجد شہید ہوچکی ہیں۔غزہ میں فلسطینی وزارت مذہبی امور نے تصدیق کی ہیکہ اسرائیل کی جانب سے حملوں میں 31 مساجد شہید ہوئی ہیں۔رپورٹ کے مطابق غزہ میں اسرائیلی حملوں سے شہید فلسطینیوں کی مجموعی تعداد 4 ہزار 651 ہوگئی ہے، شہید ہونے والوں میں 40 فیصد بچے شامل ہیں۔اسرائیلی حملوں سے غزہ میں 14 ہزار 245 سے زائد فلسطینی زخمی ہوئے ہیں، غزہ کے زخمی فلسطینیوں میں 70 فیصد بچے اور خواتین شامل ہیں۔

اسرائیل نے غزہ میں حملے مزید تیز کرنیکا اعلان کرتے ہوئے ایک بار پھر فلسطینیوں کو غزہ کا شمالی علاقہ خالی کرکے جنوب کی طرف جانیکی دھمکی دی ہے۔اسرائیلی فوج کے ترجمان نے پریس کانفرنس کرتے ہوئے کہا کہ اسرائیل حماس پر دباؤ بڑھانے کے لیے غزہ میں اپنے حملوں کو تیز کریگا۔فوجی ترجمان ایڈمرل کے مطابق ہمیں جنگ کے اگلے مرحلے میں داخل ہونا ہے اور اس کے لیے ہم کسی کے بتائے ہوئے راستے پر نہیں چلیں گے۔

ادھر رفح کراسنگ سے امدادی سامان کے ٹرکوں کا دوسرا قافلہ غزہ میں داخل ہوگیا۔ گزشتہ روز امدادی سامان کے صرف 20 ٹرک غزہ کے جنوبی علاقے تک پہنچے تھے۔کیتھولک عیسائیوں کے روحانی پیشوا پوپ فرانسس نے ایک بار پھر اسرائیل فلسطین کشیدگی پر افسوس کا اظہار کیا ہے۔ایک بیان میں انہوںنے کہاکہ جنگ ہمیشہ شکست ہوتی ہے، انسانیت کی تباہی ہوتی ہے، بھائیوں اسے روکو۔