لاہور(نیوزڈیسک)سابق اسپیکر قومی اسمبلی اوراین اے122سے مسلم لیگ (ن) کے امیدوار سردار ایاز صادق نے کہا ہے کہ ضمنی انتخاب سے قبل ہی تحریک انصاف کے غبارے سے ہوا نکل چکی ہے،11اکتوبر کو انتخابی نتائج 2013ءکے نتائج سے مختلف نہیں ہونگے بلکہ (ن) لیگ کو پہلے سے زیادہ ووٹ ملیں گے ،عمران خان آئیں یا کوئی اور ہمیں کوئی فرق نہیں پڑتا ،سیاسی جماعتوں کے سربراہوں پر انتخابی مہم چلانے کے حوالے سے لاہور ہائیکورٹ کے فیصلے میں ابہام ہے، ابہام دور ہو گیا تو وزیراعظم اور وزیراعلی پنجاب کے بطور سیاسی جماعت کے سربراہ کے انتخابی مہم چلانے کا عندیہ آ سکتا ہے۔انتخابی مہم کے سلسلہ میں مختلف مقامات پر خطاب اور میڈیا سے گفتگو کرتے ہوئے سردار ایاز صادق نے کہا کہ پاکستان مسلم لیگ (ن) کی حکومت کی کارکردگی سب کے سامنے ہے ، عمران خان کو شروع دن سے لاہور کی ترقی ہضم نہیں ہو رہی ۔ لاہور مسلم لیگ (ن) کا قلعہ تھا ہے اور انشا اللہ آئندہ بھی رہے گا۔ دھرنا سیاست کرنے والے بتائیں انہوں نے ملکی ترقی میں سوائے رکاوٹیں ڈالنے کے اورکیا کام سر انجام دیا ہے جس پر عوام انہیں ووٹ دیں۔ انہوں نے جامعہ نعیمہ میں میڈیا سے گفتگو کرتے ہوئے کہا کہ نیب کوقانون کے دائرے میں رہتے کرپشن کوروکناچاہیے کیونکہ ملک کو کرپشن سے پاک کئے بغیر کوئی چارہ نہیں، دعا ہے کہ اللہ ملک کو دہشت گردی کی لعنت سے پاک کرے تاکہ ملک خوشحال اور ترقی کی راہ پر گامزن ہو سکے۔