اسلام آباد (این این آئی)سابق وفاقی وزیر اور استحکام پاکستان پارٹی کی ترجمان فردوس عاشق اعوان نے قومی کرکٹ ٹیم کے اسٹار آل راؤنڈر شعیب ملک کی شادی کے وقت ان سے پْتر (بیٹا) بڑا برا پھنسے ہوکی بات کہنے سے متعلق اصل کہانی سے پردہ اٹھاتے ہوئے انکشاف کیاہے کہ ولیمے کے دن حیدر آباد میں دلہن کے ساتھ تصاویر بنوانے سے منع کر دیا گیا تھا ۔فردوس عاشق اعوان نے ایک انٹرویومیں انکشاف کیا تھا کہ جب شعیب کی شادی ہوئی تو اس نے ضد کی کہ آپ لوگ میرے ساتھ بارات میں جائیں گے، شعیب نے کہا میری دلہن کو انڈیا سے لانے ساری فیملی جائیگی اور چونکہ میں بھی حصہ تھی اور ان دنوں ایم این اے تھی لہذا مجھ سے کہا گیا تھا یہ سونے کا تاج آپ پہنائیں گی۔

فردوس عاشق نے بتایا کہ جب ہم بھارتی حیدرآباد ان کے سسرال پہنچے تو پہلے دن میں نے شعیب کے کان میں یہ کہہ دیا تھا کہ پْتر (بیٹا) بڑا برا پھنسے ہو کیونکہ مجھے نظر آگیا تھا کہ جو وہاں کی صورتحال تھی، چونکہ ان دونوں کی محبت کی شادی تھی اس لیے دونوں نے ہی کافی کمپرومائز کیا، مجھے پتہ چل گیا تھا کہ جب تک محبت کا بھوت سوار ہے یہ چلے گا تاہم شادی کے وقت ایسا کیوں اور کیا دیکھ کر کہا اس حوالے سے نجی میڈیا سے گفتگو کے دوران فردوس عاشق نے بتایا کہ جب ہم شعیب کے سسرال میں ولیمے کیلئے حیدرآباد پہنچے تو ہم نے ایک دلچسپ صورتحال دیکھی، ولیمے میں پہنچتے ہی ہم سب کی خواہش دلہا دلہن کے ساتھ تصویریں لینے کی تھی لیکن جب ہم تصویریں لینے لگے تو شعیب کی ساس نے کیمرے والے کو روک دیا۔

سابق وفاقی وزیر کے مطابق جس پر میں نے شعیب سے پوچھا کہ ایسا کیوں تو اس نے کیمرے والے کو کہا کہ’ ہ ہمارے پاکستان سے آئے مہمان ہیں آپ ہمیں تصویریں کیوں نہیں بنانے دے رہے؟ جس پر شعیب کو بتایا گیا کہ آپ کا ولیمہ ہم آؤٹ سورس کر چکے ہیں، مقصد یہ تھا کہ شعیب کے سسرال والے اس کے ولیمے کو بیچ چکے تھے اور تصویریں نہ لینے کی بات بھی اس کنٹریکٹ کا حصہ تھی، شعیب کو بتایا گیا کہ لہٰذا اب تصویریں بھی اس ولیمے کے رائٹ لینے والا Vandor ہی لے سکتا ہے اور ریلیز کرسکتا ہے اس کے علاوہ کوئی بھی تصویر نہیں لے سکتا اور نہ ریلیز کرسکتا ہے۔فردوس عاشق نے بتایا کہ یہ بات ہمارے لیے حیران کن تھی کہ کوئی سسرال داماد کی شادی کو بک کر سکتا ہے اور اس کی تصویروں پر پابندی لگاسکتا ہے تاہم ہم نے ہی معاملے کی نزاکت سمجھتے ہوئے کہا کہ جب آپ کا کیمرا مین تصویریں ریلیز کردے تو ہمیں بھی بھیج دی جائیں، ہمیں تصویریں دیر سے ہی سہی مل گئیں جس پر شعیب کو شرمندگی ہوئی، مجھے شعیب اس وقت اپنے سسرال کے سامنے بے بس نظر آیا تھا تب میں نے شعیب کے کان میں یہ بات کی تھی۔