اسلام آباد(این این آئی)اتحادیوں کی بڑی بیٹھک میں نگران وزیر اعظم کیلئے شاہد خاقان عباسی اور حفیظ شیخ سمیت کئی بڑے نام سامنے آ گئے۔تفصیلات کے مطابق وزیراعظم شہبازشریف کی زیر صدارت پاکستان ڈیمو کریٹک موومنٹ(پی ڈی ایم)اوراتحادی جماعتوں کے سربراہوں کا اجلاس ہوا جس میں سربراہ پی ڈی ایم مولانا فضل الرحمان اور دیگر رہنمائوں نے شرکت کی۔ذرائع کے مطابق اجلاس میں مشاورت کے بعد اتحادی جماعتوں نے شاہد خاقان عباسی ، حفیظ شیخ، فواد حسن فواد، اسلم بھوتانی اور ذوالفقار مگسی سمیت کئی نام پیش کردئیے ۔

ذرائع کے مطابق پی ڈی ایم اور اتحادی جماعتوں نے وزیراعظم شہبازشریف کو نگران وزیراعظم کا نام فائنل کرنے کا اختیار دے دیا ہے جبکہ اپوزیشن لیڈر سے مشاورت کرنے کی منظوری بھی دے دی گئی ۔دوسری جانب قائد حزب اختلاف راجہ ریاض کا کہنا ہے کہ 8یا 9اگست کو مشاورت ہوگی، امید ہے اچھے نتائج سامنے آئیں گے۔صحافی کی جانب سے اپوزیشن لیڈر سے سوال کیا گیا کہ کیا نگراں وزیراعظم کیلئے آپ سے مشاورت ہوئی ہے؟

جس کے جواب میں راجا ریاض کا کہنا تھا کہ نہیں ابھی تک کوئی مشاورت نہیں ہوئی، انشا اللہ 8یا 9اگست کو مشاورت ہوگی، امید ہے اچھے نتائج سامنے آئیں گے۔علاوہ ازیں وزیراعظم شہباز شریف کی جانب سے الوداعی ملاقاتوں کا سلسلہ جاری ہے ، گزشتہ روز ان کی طرف سے ارکان قومی اسمبلی وسینیٹ کے اعزاز میں پر تکلف عشائیے کا اہتمام کیا گیا، وزیراعظم نے ارکان پارلیمنٹ کا گرم جوشی سے استقبال کیا۔