اسلام آباد/لاہور(این این آئی)محکمہ موسمیات نے ملک کے مختلف علاقوں میں 22سے26جولائی کے دوران موسلا دھار بارشوں کی پیشگوئی کی جس کے باعث نشیبی علاقے زیر آب آنے، پہاڑی علاقوں میں لینڈ سلائیڈنگ اوربرساتی ندی نالوں میں طغیانی کا خدشہ ظاہر کیا گیا ہے ۔

محکمہ موسمیات کے مطابق اسلام آباد، راولپنڈی، پشاور، سیالکوٹ،نارووال ،گوجرانوالہ اورلاہور میں موسلا دھار بارش کے باعث نشیبی علاقے زیر آب آنے کا خدشہ ہے جبکہ مری،گلیات،کشمیر، گلگت بلتستان اور خیبر پختو نخواہ کے پہاڑی علاقوں میں لینڈ سلائیڈنگ کے علاوہ ڈیرہ غازی خان اور اس سے ملحقہ بلوچستان کے مقامی اور برساتی ندی نالوں میں طغیانی کا خدشہ ہے ۔آج ہفتہ کو کشمیر، گلگت بلتستان، اسلام آباد، خطہ پوٹھوہار سمیت پنجاب، شمال مشرقی اورجنوبی بلو چستان ،خیبر پختونخوا اور سندھ میں آندھی/تیز ہوائوں اورگرج چمک کے ساتھ بارش کا امکان ہے، اس دوران کشمیر،شمال مشرقی پنجاب، خطہ پوٹھوہار ،اسلام آباد ، بالائی خیبر پختونخوا اور سندھ شمال مشرقی بلو چستان اور سندھ میں چند مقامات پر موسلادھار بارش کی توقع ہے ۔

پی ڈی ایم اے نے گرج چمک کے ساتھ بارشوں اور تیز ہوائوں کے پیش نظر ضلعی انتظامیہ کو پیشگی اقدامات اٹھانے کی ہدایات کرتے ہوئے الرٹ جاری کیا ہے، جس میں کہا گیاہے کہ بالائی اضلاع میں لینڈ سلائیڈنگ اورفلیش فلڈنگ کا خدشہ ہے۔گزشتہ 24گھنٹے کے دوران خطہ پوٹھوہار،پنجاب، سندھ، بالائی/وسطی خیبر پختونخوا، کشمیر، گلگت بلتستان اور قلات میں تیز ہوائوں اورگرج چمک کے ساتھ بارش اور بعض مقا مات پر موسلادھار بارش بھی ہوئی۔