اسلام آباد(این این آئی)انتخابی اصلاحات کیلئے قائم کی جانے والی پارلیمانی کمیٹی کے اجلاس کی اندرونی کہانی سامنے آگئی۔ذرائع کے مطابق انتخابی اصلاحاتی کمیٹی نے73میں سے 70مجوزہ تجاویز کا عمومی جائزہ لیا، سیاسی جماعتوں کی جانب سے انتخابی نتائج میں تاخیر پر شدید تشویش کا اظہار کیا گیا۔ذرائع کے مطابق سیاسی جماعتوں نے اتفاق کیا کہ تاخیر سے آنے والے نتائج تسلیم نہیں کئے جائیں گے، پریذائیڈنگ افسر کو نتائج مکمل کرنے کیلئے وقت مخصوص کرنے کی تجویز پر اتفاق کیا گیا ہے۔ذرائع نے بتایاکہ نتائج کی تاخیر پر پریذائیڈنگ افسر سے جواب طلبی کی جائے گی، پریذائیڈنگ افسر انتخابی نتائج کی تاخیر پر ٹھوس وجہ بتانے کا پاپند ہوگا،
ریٹرنگ افسر ماتحت پریذائیڈانگ افسران کو جدیدمواصلاتی آلات کی فراہمی یقینی بنائے گا۔ یہ بھی تجویز دی گئی کہ پریذائیڈنگ افسر اپنے دستخط شدہ مکمل نتائج کی تصویر ریٹرنگ افسر کو بھیجنے کا پاپند ہوگا، پریذائیڈنگ افسر کو تیز ترین انٹرنیٹ اور اسمارٹ فون دینے کی بھی تجویز پیش کی گئی۔
