مکہ مکرمہ (این این آئی)ایک لاکھ 57 ہزار پاکستانی عازمین حج سعودی عرب پہنچ گئے۔ ترجمان مذہبی امور کے مطابق 81 ہزار عازمین سرکاری جبکہ 76 ہزار نجی حج اسکیم کے ذریعہ پہنچے،حج سے قبل آخری نماز جمعہ کی ادائیگی کے لئے خانہ کعبہ میں شدید رش کے مناظر دیکھے گئے ، سعودی انتظامیہ نے رش کو کنٹرول کرنے کے لیے ٹرانسپورٹ علی الصبح بند کر دی

سعودی مکاتب نے منیٰ عرفات کے خیموں کی تیاری کو حتمی شکل دیدی ،عازمین حج اتوار اور پیر کی درمیانی شب منیٰ کی خیمہ بستی میں بسوں کے ذریعے پہنچائے جائیں گے۔ ڈی جی حج کے مطابق 63 فیصد سرکاری حجاج کو مشائر ٹرین کی سہولت فراہم کی جائے گی۔ ڈی جی حج کے مطابق 37 فیصد سرکاری حجاج بسوں کے ذریعے منیٰ سے عرفات اور مزدلفہ پہنچائے جائیں گے،وادی منیٰ اور جمرات میں پاکستانی معاونین کی گائیڈنگ پوسٹیں مقرر کر دی گئیں،منیٰ میں پاکستان حج مشن کے 2 کیمپ آفس قائم کر دیئے گئے،شعبہ گمشدگی و بازیابی، رہنمائی، شکایات، مانیٹرنگ ڈیسک 24 گھنٹے سہولت فراہم کریں گے ،وفاقی وزیر مذہبی امور سینیٹر طلحہ محمود عام حاجیوں کے ساتھ حج ادا کریں گے۔سینیٹر محمد طلحہ محمود نے متعدد پاکستانی بلڈنگز کا دورہ کیا اور عازمین حج سے ملاقاتیں کیں ،سینیٹر طلحہ محمود نے حج میڈیکل مشن کا دورہ اور پاکستانی عازمین سے ملاقاتیں کیں۔ سینیٹر طلحہ محمود نے کہاکہ عازمین حج کی بہترین رہنمائی اور شکایات کا ازالہ کیا جائے گا،نجی حج گروپ آپریٹرز اپنے حجاج کو بہترین سہولیات فراہم کریں۔ وزیر مذہبی امور نے انتباہ جاری کرتے ہوئے کہاکہ پرائیویٹ حج پیکیج کی خلاف ورزی پر سخت کارروائی کی جائے گی۔عازمین حج نے اعلیٰ انتظامات پر وزیر مذہبی امور کو خراج تحسین پیش کیا ۔