اسلام آباد (مانیٹرنگ ڈیسک/این این آئی) سمندری طوفان بپر جوائے گجرات کے بعد اگلی منزل کی طرف بڑھنا شروع ہو گیا ۔ نجی ٹی وی کے مطابق گجرات کے بعد بپر جوائےریاست راجستھان کی طرف بڑھ رہا ہے۔

بھارتی میڈیا کے مطابق محکمہ موسمیات نے خبردار کیا ہے سمندری طوفان بپرجوائے کا اگلا پڑاؤ راجستھان ہوگا۔خیال رہے کہ گزشتہ شب سمندری طوفان بپرجوائے نے بھارتی ریاست گجرات میں تباہی مچادی جس سے مقامی لوگوں کی پریشانی مزید بڑھ گئی۔

بھارتی میڈیا کے مطابق سمندری طوفان سے گجرات میں 527 سے زائد درخت جڑ سے اکھڑ گئے جبکہ 3 ہزار 672 سے زائد بجلی کے کھمبے گر گئے۔

بجلی کے کھمبے گرنے سے گجرات کی تحصیل مالیا کے 45 دیہات میں بجلی معطل ہوگئی جبکہ سیکڑوں ٹرینوں کو 18 جون تک کینسل کردیا گیا ہے۔

بھارتی میڈیا کے مطابق سمندری طوفان بپرجوائے کی کیٹیگری انتہائی شدید سے شدید میں بدل گئی ہے۔بھارتی میڈیا کے مطابق گجرات میں ہواں کی رفتار 115 سے کم ہو کر 105 کلومیٹر فی گھنٹہ ہوگئی ہے۔

طوفان کے باعث راجستھان میں شدید بارشوں کا امکان ظاہر کیا گیا ہے۔