لاہور( این این آئی) محکمہ ایکسائز اینڈ ٹیکسیشن نے بڑا کریک ڈائون کرتے ہوئے نا دہندگان سے کروڑوں روپے کی ریکوری کر لی، ڈائریکٹر لاہور ریجن اے محمد علی نوید کی سربراہی میں 7 کروڑ روپے کی ریکوری کی گئی،گالف کلب 7 کروڑ کا نادہندہ تھا۔

ڈائریکٹر جنرل ایکسائز اینڈ ٹیکسیشن کے مطابق میٹرو سٹور سے 83 لاکھ، ماڈل ٹائون سوسائٹی سے 70 لاکھ ،نجی یونیورسٹیوں سے بالترتیب48 لاکھ اور33، ای ایف یو انشورنس سے 35 لاکھ ،، جمخانہ کلب سے 26 لاکھ وصول،ایل ڈی اے سے ساڑھے 22 لاکھ، بنک الفلاح سے 20 لاکھ وصول کئے گئے ۔ڈی جی ایکسائز کے مطابق ڈی ایچ اے ہیڈآفس اور ذیلی دفاتر کی جانب سے بقایا 4 کروڑ جمع کرانے کی یقین دہانی کرائی گئی۔شاہین فائونڈیشن کی جانب سے بھی واجب الادا 81 لاکھ جمع کرانے کی یقین دہانی کرائی گئی۔ ہجویری پلازہ 35 لاکھ، روپالی گروپ کو23 لاکھ کی نا دہندگیا پر نوٹس جاری کر دئیے گئے ۔قذافی اسٹیڈیم ، کرکٹ بورڈ ، پی سی ایس آئی آر کو بھی نوٹس جاری کر دئیے گئے۔امپوریم مال، ای ایم ای سوسائٹی اور ایکسپو سنٹر بھی ٹیکس نادہندہ ہیں۔عدم ادائیگی پر دفاتر اور عمارتیں سیل کر دی جائیں گی۔ڈی جی ایکسائز نے ہدایت کی کہ ایکسائز افسران 30جون سے پہلے ٹارگٹ پورے کریں۔