اسلام آباد: شیل پٹرولیم کمپنی نے پاکستان میں اقتصادی بحران کے دوران اپنے شئیر فروخت کرنے کا فیصلہ کر لیا۔اس اعلان سے پاکستان میں شیل پاکستان لمیٹڈ کی جاری کاروباری سرگرمیوں پر کوئی فرق نہیں پڑے گا۔ شیل پٹرولیم کمپنی کو 2022 میں ڈالر کی قدر میں اضافے اور پاکستانی روپے کی
قدر میں کمی کے باعث بھاری مالی نقصان کا سامنا کرنا پڑا۔
علاوہ ازیں برطانوی کپمنی کو واجبات کی وصولی میں بھی مسائل کا سامنا کرنا پڑا جس کے باعث کمپنی نے یہ فیصلہ کیا۔ برطانوی خبر رساں ادارے کے مطابق شیل کمپنی
نے کہا ہے کہ وہ شیل پاکستان کے 77 فیصد حصص فروخت کر دے گی اور کمپنی کا انتظام و انصرام خریدار کے حوالے کر دے گی۔شیل کے ترجمان کے مطابق حصص کی فروخت میں گروپ کے دیگر کاروبار بھی شامل ہیں جن میں پاک عرب پائل لائن کمپنی لمیٹڈ (پارکو) کے 26 فیصد مالکانہ حقوق بھی شامل ہیں۔
شیل پٹرولیم کمپنی کی جانب سے پاکستان ایکسچینج اور سیکیورٹی ایکسچینج کمیشن آف پاکستان کو لکھے گئے خط میں بتایا گیا کہ شیل ادارہ پاکستان میں اپنے حصص فروخت کر رہا ہے جس کی منظوری بورڈ آف ڈائریکٹرز کے اجلاس میں دی جا چکی ہے۔اس فروخت سے پاکستان میں جاری شیل کے آپریشنز پر کوئی فرق نہیں پڑے گا اور وہ جاری رہیں گے۔
