اسلام آباد (این این آئی)پی ٹی آئی کے مزید 3رہنمائوں نے پارٹی چھوڑنے کا اعلان کردیا۔تفصیلات کے مطابق پی ٹی آئی کی سابق ممبر پنجاب اسمبلی سعدیہ سہیل رانا نے ویڈیو بیان میں کہا کہ 9مئی کو ہونے والے واقعات کی مذمت کرتی ہوں، یہ واقعہ چیئرمین پی ٹی آئی کی ہدایت پر پیش آیا

وزیر آباد واقعہ کے وقت بھی عوام اور کارکنوں کو اکسایا گیا کہ وہ کینٹ کا رخ کریں۔انہوں نے کہا کہ کور کمانڈر ہائوس میں جلائو گھیرائو ہمارے لئے بطور قوم دھچکا ہے، پاک فوج ہمارا غرور اور فخر ہے۔سعدیہ سہیل رانا نے کہا کہ میں پارٹی کے تمام عہدوں سے استعفیٰ دے کر سیاست چھوڑنے کا اعلان کرتی ہوں۔سرگودھا سے تعلق رکھنے والے پی ٹی آئی رہنماء سابق صوبائی اسمبلی فیصل فاروق چیمہ نے بھی ایک ویڈیو میں پارٹی چھوڑنے کا اعلان کرتے ہوئے کہا کہ آئندہ کا لائحہ عمل مشاورت کے بعد کروں گا۔ادھر کراچی سے تحریک انصاف کے رکن سندھ اسمبلی علی عزیز جی جی نے اپنے ویڈیو بیان میں پی ٹی آئی چھوڑنے کا اعلان کرتے ہوئے کہا کہ 9مئی کے واقعات کی مذمت کرتا ہوں، جو لوگ بھی 9مئی کے واقعات میں ملوث ہیں ان کی انکوائری کی جائے اور قانون کے مطابق سزا دی جائے۔انہوں نے کہا کہ مضبوط پاک فوج محفوظ پاکستان کی ضمانت ہے۔ انہوں نے کہا کہ 1996میں پی ٹی آئی سے وابستہ ہوا، اب سیاست سے وقفہ لینا چاہتا ہوں، میری والدہ علیل ہیں جن کی خدمت کرنا چاہتا اور اپنی فیملی کو وقت دینا چاہتا ہوں۔