کراچی(این این آئی) مغربی ہوائوں کا سلسلہ بلوچستان میں داخل ہوگیا، پیر سے مغربی سسٹم وسطی بالائی سندھ تک پھیلنے کا امکان ہے۔موسمی نظام کے زیراثر29سے 31 مئی کے دوران جامشورو، سانگھڑ، خیرپور، سکھر، کشمور، جیکب آباد، لاڑکانہ، قمبر شہداد کوٹ

شہید بے نظیر آباد، نوشہرو فیروز میں آندھی اور گرج چمک کے ساتھ موسلادھار بارش کا امکان ہے۔اسکے علاوہ مٹیاری، حیدرآباد، ٹنڈومحمد خان، ٹنڈوالہیار، میرپورخاص،عمرکوٹ اور تھرپارکر میں بھی آندھی کے ساتھ گرج چمک اور موسلادھار بارشیں ہوسکتی ہیں۔اس سسٹم کے تحت دیہی سندھ کے اضلاع میں ژالہ باری ہونے کی بھی توقع ہے۔ تیز ہوائیں چلنے کے سبب بالائی سندھ میں کمزور املاک اور کھڑی فصلوں کو نقصان پہنچ سکتا ہے جبکہ تیز ہوائوں کے پیش نظر عوام کو محفوظ مقامات پر رہنے کی ہدایت کی جاتی ہے۔دوسری جانب، کراچی میں اگلے 3 روز کے دوران موسم گرم اور مرطوب رہنے کا امکان ہے اور زیادہ سے زیادہ درجہ حرارت 34 سے 36 ڈگری کے درمیان ریکارڈ ہوسکتا ہے۔محکمہ موسمیات کے مطابق صبح سے دوپہر کے درمیان بلوچستان کی مغربی جبکہ شام میں سمندری ہوائیں چل سکتی ہیں۔ ہوا میں نمی کا تناسب انتہائی اضافے کے ساتھ 75 سے 85 فیصد کے درمیان رہنے کا امکان ہے۔