لاہور ( این این آئی) لاہورہائیکورٹ نے نگران پنجاب حکومت کو کام سے روکنے کی درخواست کو سماعت کے لئے منظور کرنے کا تحریری حکم جاری کر دیا۔تحریری حکمنامے میں کہا گیا کہ درخواست کو باقاعدہ سماعت کے لئے منظورکیا جاتا ہے۔

ایڈووکیٹ جنرل پنجاب کو معاونت کے لئے 27اے کا نوٹس جاری کردیا گیا۔عدالت نے وفاقی حکومت ،الیکشن کمیشن کو نوٹس جاری کر دیئے ۔تمام فریقین 6جون کو تحریری طور پر جواب جمع کرائیں۔درخواست گزار کے مطابق اسمبلی تحلیل کے 90روز کے اندرالیکشن ہونا تھے،نگران حکومت غیر آئینی ہے۔واضح رہے کہ شیخ رشید نے اپنے وکیل اظہر صدیق ایڈووکیٹ کی وساطت سے درخواست دائر کی تھی جس میں موقف دیا کہ نگراں حکومت کی 90 دن کی مدت پوری ہو چکی ہے اور آئینی طور پر نگراں حکومت مزید کام نہیں کر سکتی۔درخواست میں استدعا کی گئی کہ عدالت نگراں حکومت کو کام سے روکنے کا حکم دے۔