ٹانک /راولپنڈی (این این آئی)خیبر پختونخوا کے ضلع ٹانک میں انٹیلی جنس کی بنیاد پر کیے آپریشن کے دوران پاک فوج 2 جوانوں نے جام شہادت نوش کیا جب کہ تین دہشت گرد مارے گئے۔پاک فوج کے شعبہ تعلقات عامہ (آئی ایس پی آر)کی جانب سے جاری بیان کے مطابق مارے گئے دہشت گرد سیکیورٹی فورسز کے ساتھ ساتھ معصوم شہریوں کے خلاف متعدد دہشت گردانہ کارروائیوں میں ملوث رہے۔
آئی ایس پی آر کی پریس ریلیز کے مطابق بہادری سے لڑتے ہوئے جام شہادت نوش کرنے والے والوں میں پنجاب کے ضلع چکوال سے تعلق رکھنے والے 39 سالہ نائیک محمد عتیق اور اٹک سے تعلق رکھنے والے 36 سالہ نائیک رجب علی شامل ہیں۔آئی ایس پی آر کے مطابق علاقے میں موجود دہشت گردوں کو ختم کرنے کے لیے علاقے میں آپریشن کیا جا رہا ہے۔
ترجمان پاک فوج کے مطابق پاکستان کی سیکیورٹی فورسز دہشت گردی کی لعنت کو ختم کرنے کے لیے پرعزم ہیں اور بہادر سپاہیوں کی ایسی قربانیاں ہمارے عزم کو مزید مضبوط کرتی ہیں۔واضح رہے کہ گزشتہ روز بھی بلوچستان کے علاقے زرغون میں سیکیورٹی فورسز کی چوکی پر دہشت گردوں کے حملے میں 3 جوان شہید ہوگئے تھے جبکہ سیکیورٹی فورسز نے جوابی کارروائی کرتے ہوئے ایک دہشت گرد کو جہنم واصل کیا۔
