اسلام آباد (این این آئی)وزارت برائے مذہبی امور نے عازمین حج سے آب زم زم کی مد میں اضافی پیسے وصول کرنے کی خبروں کی تردید کرتے ہوئے کہا ہے کہ اس مد میں کوئی اضافی رقم نہیں لی جائے گی۔ پیر کو اپنے بیان میں وفاقی وزیر برائے مذہبی امور سینیٹر طلحہ محمود نے کہاکہ حج انتظامات کی نگرانی خود کر رہا ہوں
حج پیکج میں آب زم زم کے پیسے شامل ہیں ، عازمین سے پیکج سے زیادہ کوئی رقم وصول نہیں کی جائے گی۔ انہوں نے کہاکہ آب زم زم سے متعلق اضافی پیسے وصول کرنے کی خبروں میں کوئی صداقت نہیں، حج انتظامات میں کوئی کوتائی برداشت نہیں کروں گا۔ دریں اثنا ترجمان وزارت مذہبی امور عمر بٹ نے واضح کیا کہ سعودی حکومت نے مخصوص پیکنگ والی آب زم زم کی بوتل کئی برس قبل شروع کی تھی،چند برس قبل حجاج زم زم کے کین خود بھرتے تھے جن کے لیک ہونے کی شکایات تھیں۔ انہوںنے کہاکہ آب زم زم کی رقم 2017 سے حج پیکج میں شامل ہے۔
