اسلام آبا د(این این آئی)پاکستان تحریک انصاف نے سابق چیف جسٹس ثاقب نثار کے بیٹے نجم ثاقب اور پنجاب اسمبلی کے حلقے پی پی 137 سے امیدوار ابوذر مقصود چدھڑ کی آڈیو سامنے آنے کے بعد چھان بین شروع کردی۔ذرائع کے مطابق ٹکٹ ہولڈر ابوذر پر2021 میں مقدمہ بھی درج ہوا۔ پولیس کے مطابق عدالت نے ابوذر اور ان کے دوست پر ہونے والے مقدمیکو خارج کردیا تھا۔
پی ٹی آئی امیدوار کے والد مقصود چدھڑ نے بتایا کہ پولیس نے غلط پرچہ کرنے پر ایس ایچ او کو معطل کردیا تھا، عدالت نے مقدمہ جھوٹا قراردے کرخارج کردیا تھا۔انہوں نے تصدیق کی کہ بیٹے کو ٹکٹ ملنے پر کسی کو کوئی رقم نہیں دی، نجم ثاقب میرے بیٹے کا کلاس فیلو ہے، ٹکٹ کیلئے ثاقب نثار نے سفارش کی تھی۔ذرائع کے مطابق ابوذر چدھڑکوپی ٹی آئی میں شامل ہوئے چند ماہ ہوئے ہیں۔خیال رہے کہ ابوذرچدھڑ کی سابق چیف جسٹس کے بیٹے نجم ثاقب کی آڈیو ٹیپ گزشتہ روز سامنے آئی تھی۔
