لاہور ( این این آئی) نگران وزیر اعلی پنجاب محسن نقوی کے عہدے پر برقرار رہنے کو لاہور ہائیکورٹ میں چیلنج کردیا گیا۔ہائیکورٹ میں شہری لطیف چوہدری کی جانب سے درخواست دائر کی گئی۔درخواست میں نگراں وزیراعلی پنجاب محسن نقوی، الیکشن کمیشن سمیت دیگر کو فریق بنایا گیا

۔درخواست میں موقف اختیار کیا گیا ہے کہ پنجاب میں نگران حکومت کی آئین میں دی گئی معیاد ختم ہو چکی ہے، سپریم کورٹ نے الیکشن کی تاریخ میں توسیع کی لیکن نگران حکومت کو توسیع نہیں دی، نگراں وزیر اعلی پنجاب محسن نقوی غیر آئینی طور پر عہدہ سنبھالے ہوئے ہیں، نگراں وزیر اعلی اور کابینہ کا عہدے پر برقرار رہنا آئین کی کھلی خلاف ورزی ہے، 90 روز گزرنے کے بعد نگران حکومت کے تمام احکامات اور اقدامات غیر آئینی ہیں۔درخواست میں استدعا کی گئی کہ عدالت نگراں وزیر اعلی محسن نقوی کو فوری عہدے سے ہٹانے اور نگراں حکومت پنجاب کو کام سے روکنے اور الیکشن کمیشن کو پنجاب میں نئی نگراں حکومت کا نوٹیفکیشن جاری کرنے کا حکم دے۔