اسلام آباد(نیوز ڈیسک) کمانڈر سدرن کمانڈ لیفٹیننٹ جنرل ناصر خان جنجوعہ کا کہنا ہے کہ بلوچستان کا ہاتھ سے نکل جانے کا تصور ختم کر دیا ہے ، خوف کے باعث پاکستان سے محبت دلوں میں چھپی تھی آج اس خوف کا بھی خاتمہ ہو گیا۔ یہ بات انہوں نے کوئٹہ میں بلوچستان نیب کی جانب سے بدعنوانی کے خاتمے میں طلباءکے کردار کے حوالے منقعدہ تقریب میں کہی۔ مہمان خصوصی کا کہنا تھا کہ بچے کرپشن کے خاتمے میں کلیدی کردار ادا کر سکتے ہیں۔ بامقصد سوچ کے ذریعے نئی نسل ملک کو ترقی کی راہ پر گامزن کر سکتی ہے ، بلوچستان کا ہاتھ سے نکل جانے کا تصور ختم ہو چکا ہے ، جو لوگ نظریات کے نام پر لڑا رہے تھے ان کے مقاصد دم توڑ چکے ہیں ، بلوچستان کی عوام کا ساتھ نہ ہوتا تو اتنی جلد کامیابی نہ ملتی۔ اس موقع پر ڈی جی نیب بلوچستان طارق محمود نے بھی اپنے خیالات کا اظہار کرتے ہوئے کہا کہ چند سال قبل بلوچستان میں پاکستان کا جھنڈا لہرانے کا تصور نا ممکن تھا تاہم آج سیکورٹی فورسز کے باعث صوبے کی عوام کو امن نصیب ہوا ہے ، بلوچستان کا مستقبل نئی نسل سے وابستہ ہے ، کرپشن کا خاتمہ ملک کو مضبوط راہوں پر گامزن کرے گا۔ انہوں نے کہا کہ رواں سال نیب نے تعلیمی اداروں سمیت مدارس کے بچوں کو بھی مختلف سرگرمیوں میں آگے آنے کا موقع دیا ہے۔