متوقع بارشیں، وفاقی وزیر کی صوبائی حکومتوں، وفاقی انتظامیہ کو وارننگ

اسلام آباد (مانیٹرنگ ڈیسک) متوقع بارشیں، وفاقی وزیر کی صوبائی حکومتوں، وفاقی انتظامیہ کو وارننگ، بالائی خیبرپختونخوا، پوٹھوہار، کشمیر اور گلگت بلتستان میں تیز ہواؤں کیساتھ بارش اور ژالہ باری کا امکان۔ روزنامہ جنگ میں صالح ظافر کی خبر کے مطابق وفاقی وزیر برائے نیشنل ہیلتھ سروسز، ریگولیشن اینڈ سروس عبدالقادر پٹیل نے متعلقہ محکموں اور صحت کی سہولیات سے متعلق کہا ہے کہ وہ اچانک بارشی سیلاب جیسی صورتحال سے نمٹنے کے لیے تمام انتظامات کریں جو کہ گزشتہ سال پیش آئی تھی اور اس سے ملک بھر میں بڑے پیمانے پر نقصان ہوا تھا۔  مختصر گفتگو میں وفاقی وزیر نے یاد دلایا کہ موسمیاتی تبدیلیوں اور درجہ حرارت کی تبدیلی نے دنیا کے مختلف حصوں اور خاص طور پر پاکستان میں موسم کا سارا نظام ہی بدل کر رکھ دیا ہے۔ اس کے نتیجے میں پورے ملک میں گزشتہ سال آنے والے سیلاب نے جان و مال کو زبردست نقصان پہنچایا۔ انہوں نے یہ وارننگ صوبائی حکومتوں، وفاقی انتظامیہ اور دیگر وفاقی اکائیوں کے ساتھ بھی شیئر کی ہے تاکہ وہ بھی کسی غیر متوقع پیش رفت سے آگاہ رہیں۔