کراچی (مانیٹرنگ ڈیسک ، این این آئی )پاکستان کرکٹ ٹیم کے اوپننگ بیٹسمین فخر زمان کا کہنا ہے کہ اچھا لگتا ہے جب ٹیم کی جیت میں اپنا بھی کردار ہوتا ہے ۔نجی ٹی وی سے خصوصی گفتگو کرتے ہوئے فخر زمان نے کہا کہ نیوزی لینڈ کی ٹیم ون ڈے کی نمبر ون ٹیم ہے اس کو پہلے میچ میں شکست دے کر ٹیم کا مورال بلند ہوا ہے۔

انہوں نے کہا کہ ٹیسٹ میچز میں وہ نتائج نہیں ملے جس کی ہم توقع کر رہے تھے لیکن ون ڈے سیریز کا آغاز اچھے انداز میں ہوا۔فخر زمان نے کہا کہ پاکستانی بولرز نے اچھی بولنگ کی جس کی وجہ سے کیوی ٹیم بڑا اسکور نہیں کرسکی جس کی وجہ سے ہم نے بھی زیادہ چانس نہیں لیا۔انہوں نے کہا کہ جو پلان بنایا تھا کہ اس کے مطابق بیٹنگ کی، کوشش ہوگی اس پرفارمنس کو اگلے دو میچز میں بھی برقرار رکھوں۔فخر زمان نے کہا کہ دوسری اننگز میں گیند زیادہ بریک ہو رہی تھی لیکن بڑا اسکور نہ ہونے کی وجہ سے پاکستان نے آسانی سے کامیابی حاصل کی۔فخر زمان نے اس امید کا اظہار کیا کہ پاکستان ٹیم نیوزی لینڈ کے خلاف کلین سوئپ کرسکتی ہے اگر اسی طرح اپنے پلان پر عمل کرتے رہیں ۔دوسری جانب  پاکستان کرکٹ ٹیم کے فاسٹ بولر نسیم شاہ نے کہا ہے کہ سب سے زیادہ اچھا محسوس ٹیم کی جیت پر ہوتا ہے۔نیوزی لینڈ کے خلاف پہلا ون ڈے میچ جیتنے اور میچ کے بہترین کھلاڑی کا ایوارڈ لینے کے بعد نسیم شاہ نے سوشل میڈیا پر لکھا کہ پرفارمنس کا مزہ ہی تب ہے جب پاکستان جیتے۔انہوں نے لکھا کہ جیت ٹیم کی کوشش ہے جس میں سب کھلاڑیوں نے اپنا حصہ ڈالا، اب نظریں اگلے میچ پر ہیں۔نسیم شاہ نے اسامہ میر کو شاندار ڈیبیو پر مبارک باد بھی دی۔فاسٹ بولر کے پیغام پر مداحوں نے کمنٹس کر کے ان کی تعریف کی اور اگلے میچ کے لیے نیک خواہشات کا بھی اظہار کیا۔

موضوعات:فخر زمان