لاہور، اسلام آباد(آن لائن، این این آئی ) مسلم لیگ (ن) کی نائب صدر مریم نواز نے آزاد کشمیر میں عام انتخابات کے موقع پر پولنگ کے آغاز پر کارکنان کو ووٹ چوری پر نظر رکھنے کی ہدایت کردی۔سماجی رابطے کی ویب سائٹ ٹوئٹر پر اپنے ایک پیغام میں مریم نواز نے

کا رکنان کو مخاطب کرتے ہوئے کہا کہ ‘ شاباش میر ے بچوووٹ چوری نہ ہونے دینا’، جان لڑا دینا مگر عوام کی امانت پر ڈاکہ نہ ڈالنے دینا۔ایک اور پیغام میں مریم نواز کا کہنا تھا کہ کنٹرول روم اور حلقوں میں موجود ن لیگ کی ٹیموں کے ساتھ رابطے میں ہوں۔لیگی نائب صدر نے ایک اور پیغام میں کارکنا ن کو ہدایات دیں کہ دھاندلی کے حوالے سے جوبھی تصاویر یا ویڈیوز سامنے آئیں انہیں سوشل میڈیا پر شیئر کرتے رہیں۔دوسری جانب پاکستان مسلم لیگ (ن) کی ترجمان مریم اورنگزیب نے کہاہے کہ آزادجموں وکشمیر کے انتخابات میں شفافیت، غیرجانبداری سوالیہ نشان بن گئی۔ اپنے بیان میں مریم اور نگزیب نے کہاکہ پولنگ سٹیشنز میں ہمارے پولنگ ایجنٹس کو داخل ہونے سے روکنے، پی ٹی آئی کی گاڑیوں میں پولنگ سامان لانے، فائرنگ اور مداخلت کے قابل مذمت واقعات کی بڑھتی تعداد انتہائی تشویشناک اور شفاف الیکشن کے تقاضوں کے منافی ہے۔ انہوں نے کہاکہ آزادجموں وکشمیر کے عوام کے ووٹ کی حفاظت ہر قیمت پر کریں گے اور دھاندلی، دباو اور دھونس کے ہر ہتھکنڈے کو بے نقاب کریں گے۔ انہوں نے مطالبہ کیاکہ الیکشن کمیشن اپنی قانونی وآئینی ذمہ داریاں پوری کرے اور عوام کے حق حکمرانی کو یقینی بنائے۔

موضوعات:مریم نواز