قائد آباد(مانیٹرنگ، این این آئی)پاکستان تحریک انصاف کے مرکزی سیکرٹری جنرل اسد عمر نے کہا ہے کہ ساڑھے تین سال وزارت عظمی پر بیٹھے خان نے بیرون ملک کوئی جائیداد نہیں بنائی۔جلسے سے خطاب کرتے ہوئے اسد عمر نے کہا کہ یہ جو مرضی کرلیں اگلا ووٹ عمران کا ہے، کپتان پچھلے 26 سال سے جدوجہد کر رہے ہیں۔

اسد عمر نے کہا کہ انہوں نے دیکھا جب پرچوں اور گرفتاری سے روکا نہیں جاسکتا تو قتل کی کوشش کی۔انہوں نے کہا کہ ان لوگوں کے پاس جتنی طاقت تھی استعمال کرچکے ہیں، جس دن یہ قوم کھڑی ہوگئی دنیا کی کوئی قوم اس کا مقابلہ نہیں کرسکتی۔ ان کا کہنا تھا کہ یہاں ووٹ تو عوام ڈالتے ہیں لیکن طاقت ان کے پاس نہیں ہوتی، پی ڈی ایم جو مرضی کر لے، اگلا دور حکومت عمران خان کا ہے، انہوں نے کہاکہ کپتان پرسوں پنڈی پہنچنے کی تاریخ کا اعلان کرے گا، کپتان نے ثابت کرکے دکھا یا ہے وہ اکیلا ہی کافی ہے۔انہوں نے کہا کہ قربانی دینے کے لئے بہادر ہونے کی ضرورت ہوتی ہے، انہوں نے دیکھا کہ عمران خان نہیں ڈرا تو اس پر قاتلانہ حملہ کیا، ان لوگوں کے پاس جتنی طاقت تھی یہ استعمال کرچکے ہیں۔اسد عمر نے کہا کہ انہوں نے کوشش کی کہ کپتان کو شہید کردیا جائے، ہمارے کارکنوں کو ہراساں کیا گیا پھر بھی قوم ہمارے ساتھ کھڑی ہے۔پی ٹی آئی رہنما نے کہا کہ چیری بلاسم کہتا ہے ہم بھکاری قوم ہیں، ایٹمی طاقت والے ملک پر غلط لوگ مسلط کیے گئے ہیں، سارے چور، 12 جماعتیں ایک طرف اور کپتان ایک طرف ہے۔

موضوعات:اسد عمر